Galatians 3

A wyidna Ta Mi Nza Gnim

1O, a Galatiyayi, aza tna cei. Nyikadonu na dna fye kwoce ye, woi zhin fye ɓo n sun layiʼa? Gama fye ɓei zhin fyei gye Yesu Kristi efi pei-pei, n gye ma wufe hoto n Yesu yi tu woi fi tu n zundu. 2Miye ma nya fye ɓo gmanyi, “Fye ɓei gwo Zafun Gyi-gyi-yi ntu n na awyidna bwashi ɓo nu?” Awo, gama Zafun Gyi-gyi-yi ɓei ɓe fye mi, fyei ku Kristi ɓo wo, fyei ku wo ga gaiciya ntu ge wa gni fye. 3Fye ku je a cinu? Gama dnan na a tnazhin ge fya shi a Yuhudiyi awyidna bwa, fye to bwa wye-wyeyi Zafun nyan n kmisunyi n, fye zhin nubo n wuna nu ge oɓa bwashi nsaiye nu ɓa zhin fya ze a Yesu viyi a kalada? 4Fye ku wahala sin n mwa ntu n Nabari manayi ɓo. Fye ye fya ya kwo nu nsayi? Kwo dnami ɓelo ma gace gaiciya.

5Ma nya fye ɓo njesun, Shekwoyi wa ga fye Zafun Gyi-gyi-yi iko wa zhin aɓo a wo-woyi n fya ba ntuge fye shi a Yahudiyi awyidna nu bwa? Awo, ceto wolo nun, kwo nyi nsa nu fya ga Kristi gaiciya fya kpema wo. 6Ibrahim ɓei bwa zhin n lonu. Shekwoyi ɓei gna ge wo kunce lo wa lo she ntuge wo ɓei ga Shekwoyi alkawali gaiciyanu. 7Fye gye deye, nge Ibrahim aɓi a hin-hin vinya ɓa nu zhin aza nɓa ga Shekwoyi gaiciya ɓai kpema wo cewo.

8– 9Knido nu shan sun a? Littafi ɓei shi esa ye nu awye n Shekwoyi ɓa gni abyedo ntu ɓa gaiciya ga ɓo. Shekwoyi ɓei ku ce gna Ibrahim tunyi n sapai ge, “Miɓa tu aza anabarka nɓa fi n kni doho-doho n ɓa gami gaiciya, shi fye gami nyi.” Kwo wulonu, aza n ɓa ga Kristi gaiciya ɓa bwa anabarka shi Ibrahim ɓei bwa nyi.

10E, Aza n ɓa kpema a Yahudiyi awyidna ɓa gni ɓa, ɓa filo n Shekwoyi knitu sinta gama litafi a ku da pei-pei, “Ekni n za tukwo n wa bma owa ye ya, n kwo kafi n Shekwoyi Littafi Owa nya nyi.” 11A ku wuyi pei-pei ge, za to lo n wo ɓa bwa Shekwoyi alheri ntuge wo shi a Yahudiyi awyidna bwan, ntuge Shekwoyi ku luda ge zokwo n yi ɓa bwa gni-gni, konu zhin gaiciya ga. Shi Anabi Habaku ɓei da nge, “Oza n wa bwa wye-wyei, wo ɓa bwa ko dna n gaiciya ga nu n Shekwoyi.”

12Gaiciya ga zokwo wulo gbo n na wyidna zokwoyi, n kwo gna nge a gni za n wa shi Shekwoyi awyidna bwa vinya, “to woi bma ko gmanyi yan. 13Ama Kristi n la yi si, woi layi kunya n zokwo ɓednayi ye, woi la yi knitu ɓenukwoyi zhinya tu n wohin tukwo. Gama a cei kafi n littafi. Knitu n za ba n na zun wo du tu n shinwa.” Shi a ɓei zun Yesu du tu n zundu shinwa nya nyi.

Shekwoyi Alkawali Nu Gyi Nabye

14Nsaiye, Shekwoyi ɓa tu abyedo anabarka, n anabarka yi n wo ɓei zhin Ibrahim alkawali nyi, Eyi vinya n yi zhin a Kristi viyi, yi ɓa bwa Zafun Gyi-gyi-yi n na zhin yi wo alkawali nyi, ntu gaiciya ga ye ɓo. 15Emi azaje ye-yei kwo dna n yi asese mi, esa oza ku alkawali zhin zado aku kwo ka, a bwatu, wota shan kwo don, Wota shan nubo zhin n na vun wa shan kwo don.

16Nsaiye, Shekwoyi ɓei ga Ibrahim alkawali o wo ɓiyi, waku kpe nge ato cige owo aɓin ngye a daɓo n wo aɓiyi vinyan – a Yahudiyi–ama aɓei daɓo ga wo Ɓi–Wato Kristi. 17Nya nyi n mi da. Shekwoyi ɓei zhin alkawali nge wo ɓa gni aza n ɓa ga gaiciya, Waku kwo kakpe, wa bwa tu, ato ɓei ɓa mi a shan kwo do kwo a wun kwo ya n aye tagyi ngun anyi-cei-kpe shita avun, n Shekwoyi ɓei ga awyidna ngun awo nyin. 18Ngye awyidna yi bwashi ɓei ɓa gni yi, kwa wunu ge zokwo do nu gbo n za ɓa bwa Shekwoyi alheri n Ibrahim nyayi. Ntuge wo ɓei gwo Shekwoyi alkawali nu kawai.

19To, knihi ɓo zhin a ga awyidna yeʼa? A ɓei ɓe ɓa n na alkawali avun nu, kwa wu aza shi ɓa bma Shekwoyi awyidna ya. Ama zokwo ye ɓei ɓe har esanu n Kristi ɓa ɓe n cei, Eɓi n Shekwoyi ɓei zhin kwo alkawali (Ko kaka yi lo fyewyi, Shekwoyi ɓei ga wo amalaika nu owo awyidna ɓa ga Musa wa ka za ga.) 20Ama esa n Shekwoyi ɓei ga Ibrahim owo alkawali wo ɓei ga wo n wo gmanyi nu, a malaika ko Musa to ɓei zhi ɓon. Zaho to ɓei dna n ɓa tasin.

21– 22To, Shekwoyi awyidna nwo alkawaliyi ɓa zhin gaba lo n na ajei nu? Awo, kwo to wolo nun. Yi ɓei gna yi ɓa bwa gni-gni n na awyidna bwashi ɓo, Shekwoyi to ɓei ɓa shan zokwo do ga n kwo ɓa gni yi n laifi akun. Ntuge littafi ku da ge, yi zhin laifi afyenu nu vinya. Zokwo gmanyi n yi ɓa kun nkwo, okwonu zhin gaiciya ga n Yesu Kristi. Zokwo pwo-pwo nya guya gni lo ntu oza ɓo n wo ɓa ga gaiciya.

23Sai esa n Kristi ɓei ɓe, owa nu ɓei zhin yi guyi, kwoi kai wye har sa n yi ɓa ga anyi Gniyi gaiciya. 24Mi ɓa dakwo lai, a Yahudiyi owa nu ɓei zhin yi nyawuyi kwoi wuyi zokwo sai sa n Kristi wa ɓe wa gayi agni-gni manayi n Shekwoyi abye dna n yi gaiciya ga. 25Ama shi Kristi la ɓe nyi, yito n na pma yi lo n owa yin, kwa wu yi zokwo lo wo abam. 26Gama nsaiye yi zhin Shekwoyi aɓi nu, dna n gaiciya ga n Yesu Kristi. 27Eyi n na kuyi zhin baptisma fi n Kristi nyi, akuyi sofi n Kristi mi. 28Yi to shan a Yahudiyi nu zhin, kwo a Heleniyi, kwo a fyenu, kwo a puwa dan, kwo a zanugbayi kwo anyikwozan, ama a Yesu viyi, yi zhin gmanyi nu dna n Kristi Yesu. 29Nsaiye she yi ku zhin Kristi nya nyi, yi ku ze Ibrahim ayawyi. Shekwoyi alkawali n wo ɓei zhin wo nyi ɓa zhin yi nya nu n sayi.